БИШКЕК, 5-мар. — Sputnik. Иса Өмүркулов Кыргызстандын социал-демократиялык партиясынын (КСДП) съездин, саясий кеңештин жыйындарын өткөрө албайт. Бул тууралуу партиядан билдиришти.
Айрым ЖМКлар Өмүркулов 3-апрелде партиянын съездин өткөрө турганын, ага экс-президент Алмазбек Атамбаев да чакырылганын жазып чыгышкан.
"3-апрелде КСДПнын съезди болот деген маалымат жалган. Эгер Өмүркулов партияга кирбеген үзөңгүлөштөрү менен чогулуш курса, "Атамбаевсиз КСДП" деген кыймылдай эле ага КСДПнын эч кандай тиешеси жок. Биздин маалымат боюнча ал жакта саясий бирикменин мүчөлөрү жок", — деп айтылат маалыматта.
КСДПнын кийинки съезди 6-апрелде өтөт. Мындай чечим саясий кеңештин 2018-жылдын 31-октябрында өткөн жыйынында кабыл алынган.
Эске салсак, КСДП Иса Өмүркуловдун аракеттери партиянын негизги максаттарына, милдеттерине жана уставына каршы келет деген негиз менен катарынан чыгарган. Бирок Өмүркулов партиянын мындай чечимин мыйзамсыз деп келет.
