БИШКЕК, 26-фев. — Sputnik. Шаардык милициянын маалымат кызматы бир кишинин өлүмүнө алып келген массалык мушташтын чоо-жайын айтып берди.
Эскерте кетсек, Чүй проспектиси менен Эркиндик бульварынын кесилишинде балдар мушташып, натыйжада 19 жаштагы жигит каза тапкан. Каргаша 24-февралга караган түнү болгон. Бычак жеген дагы бир бала ооруканада.
"21-февраль күнү саат 1.57де Биринчи Май райондук милициясынын нөөмөт бөлүмүнө "Ала-Тоо" аянтындагы массалык мушташ тууралуу маалымат түшкөн. Окуя болгон жерге ыкчам топ чыгып кеткен, бирок жерине келгенде эч кимди тапкан эмес. Бир нече убакыттан кийин шаардык ооруканалардын биринен бычак жеген 19 жаштагы эки жигит түштү деген кабар келген. Бирөө операция маалында үзүлгөн", — дешти милициядан.
Тартип сакчыларынын маалыматы боюнча 23-февраль күнү бир нече жигит ижарага алган батирде биринин туулган күнүн майрамдап, отурушка эки кызды чакырышат. Бир аздан соң жигиттер менен кыздардын ортосунда чыр чыгып, мейманга келген бийкечтер телефон аркылуу өз тааныштарын чакырышат.
Каза болуп калган жигиттин достору батирди Чүй проспектиси менен Гоголь көчөсүнүн кесилишиндеги аймактан ижарага алышканын, жалпы жонунан сегиз экенин айтып беришкен. Кыздар менен уруша кеткенден кийин алардын номерине сегиз жигит кирип келип мушташа кетишкен. Андан кийин алар батирден качып чыгууга аргасыз болушкан.
Саат 1.30 менен 2.00дүн ортосунда балдар Чүй проспектиси менен Эркиндик бульварынын кесилишине жеткенде артынан куугунчулар жетип келген. Аларга аянттагы көңүл ачуучу жайдан чыккан дагы 20дай бала кошулуп кеткен. Мушташ учурунда эки балага бычак урулган. Маркумдун досторунун айтымында, кол салган тараптагы үч жигит бычак көтөрүп жүргөн.
