БИШКЕК, 21-фев. — Sputnik. Криминалдык милициянын кызматкерлери адам өлүмүнө шектүү деп 52 жаштагы эркекти кармашты. Бул тууралуу Чүй облустук милициясы билдирди.
"Люксембург айылынын тургуну ушул жылдын 8-январында 43 жаштагы бир тууганы жоголуп кеткенин айтып милицияга кайрылган. Ал өткөн жылдын декабрь айында Милянфан айылындагы үйүнөн чыгып кеткен боюнча кайтып келген эмес", — деп айтылат билдирүүдө.
Алдын ала маалыматка караганда, 27-декабрь күнү шектүү менен милянфандык киши спирт ичимдиктерин ичип отуруп уруша кеткен. Жыйынтыгында шектүү бөтөлкөлөшүн өлтүрүп салган.
Андан соң сөөктү үйдүн короосундагы шкафка катып койгон. Аталган факты боюнча КРдин Жазыктар кодексинин 130-беренеси ("Адам өлтүрүү") менен кылмыш иши козголду.
