Модернизациялоо иштери Бүткүл дүйнөлүк метеорология уюмунун жана донорлордун жардамы менен ишке ашат. 2019-жылы Дүйнөлүк банктан бөлүнчү 5 миллион доллар өлкөнүн гидрология тармагын иликтөөгө сарпталат. Бул тууралуу Рыскелди Асанходжаев Sputnik Кыргызстан радиосунун эфиринде маек куруп жатып билдирди.
Анын айтымында, бөлүнгөн каражаттын жарымы гранттык негизде, калганы насыяга берилет.
"Биз мамлекеттик мекеме болгондуктан өлкө казынасынан бөлүнгөн каражаттын 80 пайызы эле айлык акыга коротулат. Модернизациялоо жумуштарын донорлордун жардамы аркылуу ишке ашырабыз. Буга чейин бөлүнгөн 6 миллион доллар каражат аба ырайын изилдөөдө керектелчү техникалык каражаттарга жумшалды. Эми мөңгүлөрдөн баштап агынды сууларга чейин изилдөө жүргүзөлү деп турабыз. Бул багытка да Дүйнөлүк банк 5 миллион доллар каражат бөлөт", — деди Асанходжаев.
Ал борбор калаа баш болгон ири шаарлардагы пайда болуп жаткан кара түтүндү жок кылуу максатында да каражат издеп жатышкандыгын кошумчалады.
