БИШКЕК, 30-янв. — Sputnik. Жогорку Кеңештин депутаттары Коомдук биринчи каналдын (КТРК) Байкоочу кеңешинин мүчөлөрүн шайлоодо катуу талкуу жаралды.
Парламентте байкоочу кеңештин мүчөлүгүнө Маркабай Ааматав, Чынар Капарова, Атыркүл Сарыбаева, Мирбек Мурзабеков жана Нургазы Мусаевдердин талапкерлиги каралды.
Эл өкүлдөрү рейтингдик жабык добуш берүү менен талапкерлерге добуш берди. Анын жыйынтыгында эң көп добуш алган Чынар Капарова (макул 79, каршы 16) мүчөлүккө кабыл алууга жактырылды деген токтомго 75 депутат макул болгон.
Бирок депутат Садык Шер-Нияз жыйынга келбей калган талапкерлерге добуш берилбей калганы мыйзам бузууга жатарын айтып, алар сотко берсе Жогорку Кеңешти утуп аларын билдирди. Анын сунушун башка депутаттар дагы колдоого алды.
Андыктан жаралган абалды чечүү үчүн токтомду жокко чыгарып, шайлоону башынан баштоо керектигин айтышты. Ал сунуш депутаттардын колдоосун таап, буга чейинки кабыл алынган бардык чечимдер жокко чыгарылды.
Кайтадан жашыруун электрондук добуш берүүнүн жыйынтыгы менен Атыргүл Сарыбаева (макул 77, каршы 37) КТРКнын коомдук байкоочу кеңешине мүчөлүккө шайланды.
Биринчи добуш берүүнү жыйынтыгы:
- Маркабай Ааматав — макул 31, каршы 51;
- Чынар Капарова — макул 79, каршы 16;
- Атыркүл Сарыбаева — макул 60, каршы 33;
- Мирбек Мурзабеков — макул 22, каршы 64;
- Нургазы Мусаев келбегени үчүн добуш берилген эмес.
Экинчи жолку добуш берүүнүн жыйынтыгы:
- Маркабай Ааматов – макул 18, каршы 75;
- Чынар Капарова — макул 61, каршы 39;
- Атыргүл Сарыбаева – макул 77, каршы 37;
- Мирбек Мырзабеков — макул 31, каршы 68;
- Нургазы Мусаев — макул 56, каршы 45.
