Ал окуя тууралуу угаары менен эле дароо кесиптешине чалып сүйлөшүп "эч кандай тиешем жок, эч жакка барган эмесмин" деген маалымат алганын айтат.
"Окуя көзөмөл өткөрүү пунктунда болгон. Ал жерде видео байкоолор күнү-түнү иштейт. Эгерде биздин депутат ал жакка барганда же тиешеси болгондо көрүнмөк. Ал жерде Самаевдин бир алысыраак тууганы бар экен, ошол үчүн аны аралаштырып жатат го. Ким күнөөлүү экенин тергөө аныкташ керек. Бул жерде эки тарап бири-бирин күнөөлөп жатат. Ошон үчүн "менин күнөөм чыгып калбасын" деген максатта саясатчылардын аты аталып жатат деп ойлойм", — деди Баатырбеков.
Аты аталган депутат өзү бул боюнча эч кандай комментарий бере элек. Журналисттер Самаевдин иш бөлмөсүнө барып да, телефон чалып да байланыша албай жатат. Белгисиз себептер менен дүйшөмбүдөн бери ишке чыга элек. Баатырбеков да анын эмнеге жумушка келбей жатканынан кабары жоктугун айтты. Ал эми анын "Чемпион" деген каймана аты бар экенин жашырган жок.
Эскерте кетсек, 26-январга караган түнү "Токмок" көзөмөл өткөрүү бекетинин жанында контрабандачылардын атышуусу болгон. Буга шектүү катары эки адамды камакка алуу чечими чыккан. Бирок экөө тең ок жегенин айтып ооруканада жатат. Араздашкан тараптардын бири "Чемпион" деген каймана аты бар Жогорку Кеңештин депутаты жана анын жакындары экени айтылууда.
Учурда укук коргоо органдары тергөө иштерин жүргүзүп жатат.
