БИШКЕК, 26-янв. — Sputnik. Испанияда куткаруучулар 13 күндөн кийин гана тереңдиги 100 метр болгон кудуктан эки жашар баланын сөөгүн алып чыкты. Бул туурасында Pais басылмасы жазды.
Хулен аттуу бала 13-январда Тоталан муниципалитетинде туурасы болгону 25 сантиметр болуп казылган техникалык кудукка түшүп кеткен. Аны казган киши чуңкурдун айланасын тосуп коюуну эстен чыгарган. Маалыматтарга караганда, бала ата-энеси менен сейилдеп жүргөндө ушундай кайгылуу окуя болгон.
Ошол күндөн тарта бөбөктү алып чыгуу боюнча иштер башталып, окуянын кандай болуп жатканына бүтүндөй өлкө көз салып турду.
Баланын сөөгүн куткаруучулар ишембиге караган күнү жергиликтүү убакыт боюнча 01:30да алып чыккан.
Басылманын жазганына караганда, аял-күйөөсү буга чейин, тагыраагы, былтыр үч жаштагы уулунан ажыраган.
