БИШКЕК, 24-янв. — Sputnik. Жогорку Кеңештин депутаты Чыныбай Турсунбеков быйыл мамлекеттик ишмер Турдакун Усубалиевдин 100 жылдыгы экенин айтып, аны өкмөт Айтматовдун мааракесин өткөргөндөй жогорку деңгээлде белгилеши керектигин билдирди.
Аны менен катар Усубалиевдин аты Бишкектеги Киев көчөсүнө берилсе, жаңылыштык болбой турганын белгиледи.
"Быйыл татыктуу уулубуздун мааракесин өткөрүү милдети турат. Турдакун Усубалиев кыргыз мамлекетин 25 жылга жакын башкарды. Бул убакыт ичинде жалпы дүң продукция 2,5 эсеге өскөн. Айыл чарба, мал чарбасы, дыйканчылык өнүктү. ГЭСтер курулду. Бишкек шаарындагы эң негизги маданий имараттар салынды. Бул кишинин эмгеги зор. Учурунда Чыңгыз Айтматов Усубалиевди Бишкек шаарынын архитектору деп жогору баа берген", — деди депутат.
"Быйыл Турдакун Усубалиевдин мааракесин татыктуу өткөрсөк, мамлекетибизге эмгеги сиңген, экономикасын көтөргөн, мамлекет деп жүрүп өмүрү өткөн инсандарга татыктуу баа берип, урмат-сый көрсөткөн болобуз", — деди эл өкүлү.
Бишкектеги Шабдан баатыр көчөсүнүн аталышы эмнеге "7-Апрель" деп өзгөртүлгөнүн да билип алыңыз.
