БИШКЕК, 11-янв. — Sputnik. Air Manas ("Пегасус") авиакомпаниясы эртең менен Бишкек — Түркия багыты боюнча уча турган учак эмнеге кармалганы тууралуу маалымат таратты.
Буга чейин социалдык тармактарда каттам 4,5 саатка кармалганын жазышкан. Эртең менен эрте уча турган самолет саат 11:42де асманга көтөрүлгөн.
Авиакомпаниянын Sputnik Кыргызстан агенттигине билдиришинче, эртең менен учактын тоңуу боюнча абалына жооп берген индикаторлорунун бири иштеген. Кышында мындай учурлар авиацияда көп кездешет.
"Учуунун коопсуздугун камсыздоо үчүн авиакомпаниянын техникалык кызматы керектүү болгон бардык аракеттерди көрдү", — деп Air Manas авиакомпаниясынан кабарлашты.
"Жүргүнчүлөргө тамак жана суусундуктар берилди. Учуудан баш тарткандардын билетинин акчасы кайтарылат. Учак жарандык авиациядан уруксат алгандан соң Стамбулга учуп кетти", — дешти компаниядан.
Авиакомпания жаралган оңтойсуз абал үчүн жүргүнчүлөрдөн кечирим сурайт.
