БИШКЕК, 2-янв. — Sputnik. Каракол шаарында алгачкы мас айдоочу кармалып, ага КРдин Административдик кодексине киргизилген өзгөртүүлөргө ылайык, 17 миң 500 сом айып салынды. Бул тууралуу Ысык-Көл облустук милициясынын маалымат кызматынан билдиришти.
Эске салсак, 2019-жылдын 1-январынан тарта Жолдо жүрүүнүн кээ бир эрежелерин бузгандагы айып пулдардын суммасы өзгөртүлүп, Административдик кодекс жаңыланды. Мурда автоунааны мас болуп айдаганы үчүн айдоочу 10 миң сом айыпка жыгылса, эми катардагы айдоочулар 17 500, ал эми кызматтагылар 55 000 сомго чейин төлөйт.
"Алгачкы айдоочу Каракол шаарында 1-январь күнү саат 13.10до кармалды. Жол инспектору Mercedes-Benz унаасын токтотуп, айдоочудан ичимдик жыттанып жатканын сезген. Наркологиялык текшерүүгө алып барганда анын ичип алганы белгилүү болду", — деп айтылат маалыматта.
Айдоочу айып пулду бир айдын ичинде төлөшү зарыл. Убагында бере албай калса, ар бир күн үчүн айыптын өлчөмүнүн 0,05 пайызына барабар кошумча акчага жыгылат.
