Мамлекет башчысы быйыл элет жерине өзгөчө көңүл бурулганын, аймактарда чоң өзгөрүүлөргө карай чечкиндүү кадамдар жасалганын КТРК аркылуу кыргызстандыктарды куттуктап жатып айтты.
Жээнбеков кирип келген жылы да ыймансыз, эл ырыскысына кол салган аткаминерлерден тазалануу уланарына, бул жылы соттук, укуктук реформалар ишке аша баштаарына токтолду.
"Кадырман калайык-калкым, өтүп бараткан жылда сиздерге берген убадаларымды аткаруу үчүн иштедим. Өлкө аймактарын түрө кыдырып, сиздер менен баарлаштым, коомубуздун ар кайсы өкүлдөрү менен жолуктум. Кандай иш болбосун сиздердин колдооңуздарды сездим. Баарыңыздарга чын пейилден чыккан ыраазылыгымды билдирем", — деген Жээнбеков.
Ал 2018-жыл Кыргызстан үчүн жакшы жылдардан болгондугун белгилеген.
"Эл аралык аренада мамлекетибиздин аброюн бекемдедик. Евразия экономикалык биримдигинде өлкөбүздүн өнүгүшүнө багытталган иштерди жасадык. Стратегиялык өнөктөшүбүз, союздашыбыз Россия менен ар тараптуу достук мамилени чыңдадык. Коңшулар менен болгон карым-катышыбызды жаңы баскычка көтөрдүк. Өлкөбүздү өнүктүрүү үчүн узак жана орто мөөнөткө стратегиябызды аныктап, багытыбызды тактадык. Келечекке карата бийик максаттарды белгиледик. Бул асыл максаттарга ыймандуу бийлик, ынтымактуу коом болгондо гана жетебиз", — деген мамлекет башчы.
Президент 2018-жылдын дагы бир жагымдуу окуясы катары улуу жазуучу Чыңгыз Айтматовдун 90 жылдыгынын белгиленишин атады.
