Театрда иштеп, "Мыскыл жана тамаша" көрсөтүүсүн алпарып, элге куудул катары таанылдым. Алгачкы жолу 1989-жылы Токтогул Сатылганов тууралуу тартылган тасмада Керимбай болуштун ролун жараттым, бирок фильмди тартуу учурунда мени көрсө эле күлө берип, тартуучу топ олуттуу кабыл ала албай койду. Бул тууралуу Акылбек Мураталиев Sputnik Кыргызстан радиосунун эфиринде маек куруп жатып билдирди.
Анын айтымында, актер өзү психологиялык жактан татаал ролдорду жараткысы келет.
"Алгачкы мен жараткан терс каарман Москвадан келген режиссердун Токтогул Сатылганов тууралуу тарткан тасмасындагы Керимбай болуштун ролу болду. Бирок мен ага чейин элге куудул-алып баруучу катары таанылгандыктан, кинону тартуу учурунда эл мени көрсө эле күлө берди. Ошондон соң куудулукту таштап, олуттуу ролдорго басым кое баштадым. Бакыт Карагуловдун режиссерлугунда Чыңгыз Айтматовдун "Кылым карытар бир күн" романынын негизинде "Бороондуу бекет" тасмасы тартылып калды. Анда да Таңсыкбаев деген терс каармандын ролун жараттым. Фильмде Таңсыкбаев Абуталипти чөлгө алпарып атып салат. Ал эми Абуталип болсо агартуучу, мугалим, Чыңгыз Айтматовдун атасынын прототиби да. Аны менин каарманым Таңсыкбаев поездге салып алып кетип баратканда артынан эки баласы "папико, папико" деп кыйкырган бойдон калышат. Аларды Чыңгыз ага менен Илгиз ага десек болот. Мына ушундай ролду жаратканым үчүн фильмдин премьерасынан кийин Чыңгыз Айтматовго кол сунуп салам берсем, ал мени менен учурашпай койгон. Бул да болсо улуу жазуучунун бала кыял, таза киши экенинен кабар берет. Бул фильмден соң мен жалаң гана терс каармандарды ойноп калдым. Жеке кыялымда психологиялык, татаал ролдорду жараткым келет", — деди Мураталиев.
Ал кийин Чыңгыз Айтматов ролду мыкты ойногондугун айтып батасын бергенин кошумчалады.
