Эки ай мурун баланын апасы бул дүйнө менен күтүүсүз кош айтышып, оорукчан жеткинчек жетим калды. Анын дарты жеңил эмес, бирок дарыгерлер каражаттын күчү менен жеңсе болорун айтышкан. Акылбектин тагдыры тууралуу Sputnik Кыргызстан агенттиги кайрадан видеосюжет тартуулайт.
Оору менен алышкан баланын дарылануусуна беш жылдан бери көмөк көрсөтүп келаткан "Руки добра" коомдук фондусунун жетекчиси Алена Конорева бала азыр оор абалда экенин, ал дайыма дарыгердин көзөмөлүндө болушу керектигин айтып берди.
"Акылбекке беш жылдан бери жардам берип келе жатабыз. Апасы экөөнү ыктыярчылар Жал кичирайонунан табышкан. Ал кезде баланын абалы өтө оор болчу. Ичи кош бойлуу келиндикиндей чоң, шишик баскан. Тамак да жечү эмес, алсыз эле. Боору жарабай калды деп айтышкан. Бирок ортодон Галина Гавришова деген жакшы дарыгерге жолугуп калып, ар кайсы жактан дары алып келип берип, жарым жылдан кийин жакшы жыйынтыкка жеттик", — деди Конорева.
Фонд жетекчисинин айтымында, баланын боорун алмаштыруунун кажети жок, болгону аны өз убагында дарылап туруу керек.
8 жашар Акылбек азыр таежелеринин колунда, апасы каза болгондо аны Жалал-Абадга алып кетишкен. Ал эми 19 жаштагы агасы анын дарылануусуна акча чогултам деп Россияга кеткен. Дилара Чимчикееванын сиңдиси Чынара Аталиеванын айтымында, эжеси уулуна чогултуп жүргөн акчасын уурдатып жибергенден көп өтпөй кан басымы көтөрүлүп бул дүйнө менен кош айтышкан.
"Кошуналарынын айтуусунда эжем каза болоордон бир жарым жума мурун үйгө ууру кириптир. Чогултуп жүргөн акчасы бар окшойт, сыягы. Анысын уулдары билбейт экен, бизге деле айткан эмес. Өзү эле ичинен ойлонуп, санааркап жүрүп кан басымы көтөрүлүп кетип жыгылып, ошону менен турбай калыптыр", — деди маркумдун сиңдиси.
