Банктык карталар аркылуу төлөм жүргүзүүдөн коркпош керек. Бул ыңгайлуу, коопсуз жана үнөмдүү соода кылуу жолу. Мындай пикирин Гүлмира Чолоева Sputnik Кыргызстан радиосунун эфиринде маек куруп жатып белгилеп өттү.
Анын айтымында, карта менен төлөгөндө сатуу салыгы алынбайт. Бул жалпы баанын бир же эки пайызын түзөт.
"Карта менен төлөм жүргүзүү ыңгайлуу жана үнөмдүү. Европа мамлекеттеринде төлөмдөрдүн 90 пайызы дээрлик карта аркылуу аткарылат. Ал эми биздин өлкөдө көбүнчө картаны бир жолку акча чыгарып алуу үчүн гана колдонушат. Учурда карталар айлык алууда, пенсия, пособие алууда активдүү иштеп жатат, ошол эле учурда колдонуучулардын дээрлик көпчүлүгү накталай акча менен төлөм жүргүзүүнү туура көрөт. Бирок дүкөндөрдөгү бааларда накталай акча менен төлөгөндө башка баа, карта аркылуу төлөм жүргүзүүдө башка нарк коюлат. Кардар банктык картаны колдонуу менен сатып алуу жүргүзгөн учурда сатуу салыгынан бошотулат. Ал эми бул салык, жалпы баанын бир же эки пайызын түзөт", — деди Чолоева.
Банк адиси карта колдонуу акчаны жоготуп алуудан сактай турганын кошумчалады.
