Кыргыз улуттук университетинде тарых, археология, этнография илимдери боюнча кафедра болгону менен ал жерде эки гана илимий даражалуу археолог бар. Алар да союз убагында даярдалып чыккан адистер. Бул тууралуу Шайыргүл Баатырбаева Sputnik Кыргызстан радиосунун таңкы эфиринде маек куруп жатып билдирди.
Анын айтымында, өлкөдөгү ЖОЖ тез арада археолог, музеологдорду даярдап чыгуусу зарыл жана окуу жайларга бул маселени ишке ашырууга Билим берүү министрлиги көмөк көрсөтүүсү керек.
"Эгемендүүлүккө жетишкенден кийин тарых, археология илимдеринин кабыл алынып жаткан стандарттарына жакшы көңүл бурулган эмес. Окуу жайларда дүйнөлүк тарыхка гана басым жасалып, Кыргызстандын тарыхын окутуу көмүскөдө калды. Муну менен биргеликте тарых илимдеринин ажырагыс бөлүгү болгон археолог, музеолог адистерин даярдап чыгуу токтоп калган. Элибизди тарыхый, руханий, маданий мурастар менен тааныштыруучу жана азыктандыруучу илимий булактар дал ушул багыттар эле. Ошондуктан азыр өлкөдө тарыхчылардын, археологдордун жетишсиздиги байкалып турат. Биз тез арада абалды жөнгө салуубуз зарыл", — деди Баатырбаева.
Андан сырткары, ал ар кандай тарыхый ачылыштар, табылгалар, академиялык гана чөйрөдө калып жатканына нааразы болду.
