БИШКЕК, 9-ноя. — Sputnik. Өзбекстандын 52 жараны күйүп кеткен автобустун айдоочусуна карата Актөбө соту өкүм чыгарды. Бул туурасында Sputnik Казакстан агенттиги билдирди.
Эскертке кетсек, ушул жылдын 18-январь күнү Казакстандын Актөбө облусундагы Иргиз районунда эл ташыган "Икарус" автобусу өрттөнүп кеткен. Анын ичинде Казань шаарына иштегени бара жаткан 54 өзбекстандык болгон. Алардын экөө куткарылып жана үч айдоочу (Казакстандын жарандары) аман калган.
Сот айдоочуларды өрт коопсуздугу боюнча талаптарды жана транспорт айдоо эрежелерин бузганы боюнча айыптуу деп тапкан. Үч айдоочу тең беш жылга эркинен ажыратылып, жети жыл бою унаа айдоого тыюу салынды.
Ал эми автобусту тескеген ТОО "Азия транзит" фирмасынын түптөөчүсү жана механик 3,5 жылга кесилди. Соттолгондор каза болгон ар бир жарандын үй-бүлөсүнө эки миллион теңге (болжол менен 370 миң сом) моралдык компенсация төлөп берүүгө милдеттендирилди.
Автобуста эмне болгон
Белгилүү болгондой, унаа ичинде авариялык учурда колдонула турчу балка жана өрт өчүрүүчү каражаттар жок болгон. Авариялык чыгуулар иштебегендиктен, жүргүнчүлөр чыга албай калышкан.
