БИШКЕК, 27-окт. — Sputnik. Эл кайрылганда мамлекеттик кызматкерлердин көбү жакшы мамиле жасабайт, андыктан аткаминерлер менен жарандарды көзмө-көз кезиктирбей, онлайн кызмат көрсөтүүлөрдү өнүктүрүү зарыл. Мындай пикирин президент Сооронбай Жээнбеков ИИМдин Мамлекеттик кызматтарды көрсөтүү борборун көрүүгө барганда айткан.
Мамлекет башчыга Коопсуздук кеңешинин катчысы Дамир Сагынбаев жана ички иштер министри Кашкар Жунушалиев Борбордун мүмкүнчүлүктөрү жөнүндө маалымат беришти.
Борбордо төлөмдөрдү кабыл алуу жайлары жана электрондук кезекке туруу аппараты орнотулган. Күнүгө маалым кат алуу максатында ИИМге 400дөн 700гө чейин адам кайрылат.
"Айрым кызматкерлер колунан келип турса дагы атайын убакытты созуп, же ордунда жок болуп, кызматын так аткарбайт. Натыйжада жаран бир нече саат кезекте туруп, нааразычылык жаралчу. Мындай борборлордун пайда болушу менен көп сааттык кезек күтүү көйгөйү чечилет. Эми мындай борборлорду бүт өлкө боюнча ачып, жарандар үчүн мамлекеттик кызматтарды өз маалында алууга шарт түзүш керек", — деди Жээнбеков.
Белгилей кетсек, ИИМдин Мамлекеттик кызматтарды көрсөтүү борбору адамдын кылмыш жоопкерчилигине тартылганы-тартылбаганы, өлкөнүн аймагында соттолгону-соттолбогону тууралуу маалым каттарды берет. Андан сырткары жарандык жана кызматтык курал-жаракты, кооптуу жардыргыч материалдарды кабыл алууга жана берүүгө лицензияларды, уруксат кагаздарын берүү кызматтарын көрсөтөт.
