БИШКЕК, 24-окт. — Sputnik. "Газпром" компаниясы Нарын шаарына жаңы спорт комплексин курду. Анын ачылышына өлкө башчысы Сооронбай Жээнбеков барды. Бул тууралуу президенттин маалымат кызматынан кабарлашты.
Президент өз сөзүндө Россия Кыргызстандын союздашы, стратегиялык өнөктөшү, эң жакын жана ишенимдүү дос өлкөлөрдүн бири экенине токтолду.
"Россия менен биздин тагдырыбыз да, тарыхыбыз да бир. Өлкөбүздүн экономикасынын эң башкы инвестору да — Россия Федерациясы. Владимир Путин менен болгон расмий жолугушууларыбызда эки тараптуу экономикалык, соода-сатык, маданий-гуманитардык алаканы чыңдоо маселелерин дайыма талкуулайбыз. Келечекте бирге ишке ашырчу дагы көптөгөн долбоорлор бар", — деди Жээнбеков.
Президент ошондой эле "Газпром-балдарга" аттуу долбоордун алкагында ушундай заманбап спорт комплекстери өлкөбүздүн ар башка аймактарында да курулганын белгиледи. Ал нарындыктарды жаңы спорт комплексинин ачылышы менен куттуктап, "Газпром" компаниясына жана россиялык өнөктөштөргө ыраазычылык билдирди.
"Газпром" Кыргызстанда иштеп баштагандан бери өлкө экономикасына 30 миллиард сомдон ашык инвестиция салган. Бюджетке салык түрүндө 42 милилард сомдон ашуун каражат төлөгөн. 10 миңге жакын кыргызстандык бул компаниянын структураларында иштейт.
