Электрондук кайырмак менен балык уулоого тыюу салуу керек. Учурда бул да популярдуулукка ээ болуп баратат. Мындай пикирин Жыргалбек Турускулов Sputnik Кыргызстан радиосунун таңкы эфиринде маек куруп жатып билдирди.
Анын айтымында, эл өкүлдөрү синтетикалык торду өлкө аймагына киргизүүгө, сатууга, аны менен балык кармоого тыюу салган мыйзам долбоорун даярдоодо.
"Балык чарба департаментине сурам жиберсем 2017-жылы 48 рейд жүргүзүлүп, браконьерлик жол менен балык кармоонун 915 учурун катталганын айтты. Алардын 903үндө синтетикалык тор колдонулган. Алар ачык эле сатыкта турат. Баасы да арзан болгондуктан браконьерлер сууга калтырып кете беришет. Синтетикалык тор 200 жылда да чирип жоголбойт экен. Тордун тешиктери кичинекей болуп, ага майда балыктар да түшүп калууда. Жыйынтыгында тонналаган балыктар суунун астында таштандыга айланып чирип, экологияга чоң зыян алып келип жатат. Мындан сырткары, балыктар да кырылып жок болууда. Ошондой эле акыркы учурларда электрондук кайырмактар да популярдуу болуп баратат. Буларга да тыюу салбасак, балыктарды аёосуз кырган курал экен", — деди Турускулов.
Ал аталган балык кармоочу каражаттарга мөөнөтсүз тыюу салуу керектигин кошумчалады.
