Жарыш Бишкек — "Манас" аэропорту жолунда болуп, ага улан-кыздардан тарта улгайган ата-апаларга чейин катышты. Уюштуруучулардын айтымында, жалпы жонунан 1500гө чукул жөө күлүк чуркаган. Алар аба ырайынын бүркөө, суук жана жамгырдын себелеп жатканына карабай келишкен. Ошондой эле марафонго Sputnik Кыргызстан маалымат агенттиги жана радиосунун кабарчылары да катышышты. Жарышта 5, 10, 21,1 жана 42,2 чакырым болуп төрт дистанция коюлган.
Аталган эл аралык марафон ушуну менен бешинчи ирет өтүп жатат. Ал "Жаз Деми" жана "Күз Деми" деп жылына эки жолу өтүп турат. 2016-жылы күздө алгачкы жарышка 350гө чукул киши катышкан. Былтыр жазда 900 адам чуркаса, күздө 1200 күлүк ат салышкан. Ал эми быйыл жазда "Ала-Арча" улуттук жаратылыш паркында болгон жарышта катышуучулардын баары 10 чакырымга чуркашкан.
Буга чейин жарым марафон деп аталып 21,1 чакырымга чейинки дистанция белгиленсе, мында 42,2 чакырым аралык да кошулуп марафонго айланды. Марага алдыңкы болуп келгендерге түрдүү кызыктыруучу сыйлыктар каралган.
