БИШКЕК, 6-окт. — Sputnik. Москва шаарында Кыргызстандын жараны бир суткага жоголуп кеткен. Бул тууралуу КРдин Россиядагы элчилиги билдирди.
Ага ылайык, 4-октябрда Казакстандын жараны Шереметьево аэропортунда Кыргызстандын жараны жоголуп кеткенин айтып, элчиликке кайрылган.
Элчиликке кайрылган жарандын белгилешинче, КР жараны ички каттам менен Симферополдон учуп келип, Астанага учуп кетиши керек болчу. Бирок ал Астанага кетчү учакка түшкөн эмес.
Эчиликтин кызматкерлери Россия ИИМинин Шереметьево аэропорту боюнча башкармалыгына кайрылып, алар кыргызстандык жаранды издеп баштаган.
Издөө-куткаруу отряддарынын кызматкерлери шаардагы аэропортторду, темир жол вокзалдарын, автовокзалдарды жана полиция бөлүмдөрүн кыдырышкан.
Натыйжада 4-октябрда ал Казань автовокзалынан табылып, кийинки күнү туугандары менен чогуу Кыргызстанга учуп кеткен.
Элчилик окуя боюнча толук маалымат бериле турганын билдирди.
