БИШКЕК, 4-окт. — Sputnik. Белгилүү германиялык фотографтын Кыргызстандын жолдорунда тушуккан окуялары интернетте кызуу талкуу жаратууда.
Немис саякатчысы жана трэвел-фотограф Макс Муенх өзүнүн Instagram баракчасынын Stories бөлүмүнө (жарым миллион катталуучусу бар) ИММ Жол кыймылы коопсуздугун камсыздоо башкы башкармалыгынын кызматкерлери менен болгон жагымсыз "жолугушуулары" тууралуу айтып берген.
Ал Ысык-Көлгө бара жатканда инспекторлор аны бир нече ирет токтотконун билдирген.
"Кыргызстан көңүлдү калтырды. Коррупцияга малынган полиция бизди төртүнчү ирет болбогон нерсе үчүн токтотуп жатат. 60 менен жүрө турган жерден 62 болуп кетти, жол чырактын күйүп-өчүп турган жашыл түсүнө өтүп кеттиң, жөө адамга жол бербей койдуң деп эле кармай беришет экен. Ар бир учурда алар өз сөздөрүнө далил келтире алган жок. Анын ордуна акча алып, анан гана кое берип жатышты. Кеңеш: айдоочулук күбөлүгүңүздү узатып жатканда акча салып коюңуз. Ошондо иш тезирээк бүтөт", — деп жазды турист.
Анын посту социалдык тармакта кызуу талкууга алынып жатат.
Ал эми ЖКККББнын маалымат кызматы туристке кат жөнөткөнүн, эгер ал чын эле ушундай окуяга туш болгону ачыкталса кызматкерлерге чара көрүлөрүн кабарлады.
