БИШКЕК, 4-окт. — Sputnik. Саламаттык сактоо министри Космосбек Чолпонбаев Жогорку Кеңештин жыйынында төрөттөн каза болгон энелердин саны былтыркы деңгээлде экенин айтып, жыл башынан бери 31 келин төрөттөн көз жумганын билдирди.
Депутаттар бүгүнкү жыйында "2018-жылдын 3-апрелинде Тунис шаарында кол коюлган "Медициналык борборлор үчүн жабдууларды берүү жана карантиндик зона куруу жана жабдылоо" долбоору боюнча Кыргызстан менен Сауд Аравия Королдугунун ортосундагы Гранттык макулдашууну ратификациялоо жөнүндө" мыйзамдын долбоорун карап жатышат.
"Статистикалык жактан алып караганда былтыркы көрсөткүчтүн деңгээлинде турабыз. Жыл башынан бери 31 эне төрөттөн каза болду. Бул жаатка дагы көңүл буруп жатабыз. Энелер көпчүлүк учурда өз убагында ооруканага, бейтапканаларга каттоого турбайт", — деди министр.
"Союз учурунда бир эне төрөттөн көз жумса, ал ооруканада иштеген башкы дарыгери болобу, директору болобу, бардыгы жоопкерчиликке тартылып, жумуштан алынчу эле. Бүгүнкү күнү ошондой чаралар көрүлүп жатабы?" — деп суроо салды депутат.
Чолпонбаев бул маселе министрликтин октябрга белгиленген коллегиясында көтөрүлө турганын, материалдар даярдалып жатканын кошумчалады.
