Акыйкатчылыкка жаңы шайланган Токон Мамытов депутаттар талапкерлерди карап жаткан учурда "Ата Мекен" фракциясынын депутаты Бахадыр Сулейманов башка мамлекеттин жараны экенин тастыктай турган документтер бар экенин айтты.
Депутат талкуу учурунда Мамытов аны башка мамлекеттин агенти жана жараны экенин ЖМКга айтып чыкканын белгиледи.
Өз кезегинде Мамытов Сулеймановду агент деп айтпаганын белгиледи.
"Сизди агент деп айткан эмесмин, аны эске алыңыз. Ал эми сиз чет мамлекеттин жараны экениңиз тууралуу материал менде бар. Ал эки ай мурда борбордук шайлоо комиссиясына берилген. Бир канча күн мурун документтин баары тийиштүү органдарга тапшырылды. Сиз ал документтерди билесиз. Казакстандын ички иштер министрлигинин жообун жана Кыргызстандын жарандыгын берүү боюнча комиссиянын катчылыгынын жообу да бар. Материалдын бардыгы топтолуп, Башкы прокуратура менен Ички иштер министрлигине тапшырылды", — деди Мамытов.
Депутат Сулейманов өз кезегинде Жогорку Кеңештин трибунасында бир канча жыл мурун бир генерал "Белизгейтти" айтса, Мамытов келип алып "казак гейтти" баштап жатканын билдирди.
Токон Мамытов болсо Бахадыр Сулейманов башка мамлекеттин жараны экени тууралуу маалыматты ага кимдер бергенин да ачыктап койду.
