БИШКЕК, 25-сен. — Sputnik. КР ИИМинин криминалдык милициясы эл аралык кылмыштуу топтун мүчөсү, Казакстанда туулуп-өсүп, өзгөчө оор кылмыштарды жасаган деп Интерпол тарабынан издөөдө жүргөн жаранды колго түшүрдү. Бул тууралуу ведомствонун маалымат кызматынан билдиришти.
"Укук коргоо органдарына аталган жаран Кыргызстандын аймагында жүргөндүгү тууралуу маалымат түшкөн. Ыкчам-иликтөө иш-чараларынын жыйынтыгында ал 22-сентябрь күнү Бишкекте кармалды", — деп айтылат маалыматта.
Чет элдик жаран өзгөчө мыкаачылык менен кылмыш жасаган эл аралык топтун 39 жаштагы мүчөсү Мурат Ниязов экени белгилүү болду. Ага Казакстандын Улуттук коопсуздук комитети тарабынан 2015-жылы издөө жарыяланган. Мекенинде сыртынан 12 жылга эркинен ажыратылган.
Учурда ал Бишкек ШИИБинин убактылуу кармоо жайында, издеп жаткан тарапка маалымат берилди.
