БИШКЕК, 25-сен. — Sputnik. Социалдык тармактарга 10-кабаттан кулаган баланы кошунасы куткарып калган видео тарады. Окуя Астана шаарында болгон.
Tengrinews.kz маалымат порталынын жазганына караганда, окуя шаардагы көп кабаттуу үйлөрдүн биринде 24-сентябрь күнү болгон. Болжол менен 6-7 жаштагы баланы алдыңкы кабатта жашаган кошунасы, 28 жаштагы Артем Карев сактап калган.
"Балконго чыга калсам, жерде кишилер кыйкырып, ары-бери чуркап жүрүптүр. Байкасам бардыгы мен тарапты карап турушат. Жогору карасам, кичинекей бала асылып туруптур. Кулап бара жаткан жеринен кармап калганга жетишип, дароо тартып алдым", — деди Карев.
Куткаруучу наристе менен сүйлөшкөндө, ал сыртка сейилдегени чыгып келейин деп ойлогонун айтып берген.
Маалыматка караганда, ошол учурда үйдүн алдында турган энеси эмне болуп жатканын көрүп, өзүн жоготуп койгон. Ага Тез жардам чакырышкан.
