БИШКЕК, 25-сен. — Sputnik. Социалдык тармактын колдонуучулары улуу жазуучу Чыңгыз Айтматовдун сүрөтү түшүрүлгөн 300 сомдук купюраны катуу талкуулашууда. Анда колдонуучулар жаңы банкнотаны чындап эле Улуттук банк чыгарганбы же фейкпи деп суроо салган.
Sputnik агенттиги бул акча биринчи жолу 2016-жылы чыкканын эскертет.
Анда Кызыл-Кыядагы базарда белгисиз бир адам Улуттук банк чыгара элек Айтматовдун сүрөтү түшүрүлгөн акча менен соодалашкан. Аталган ведомство ошондо эле жасалма акчалардан сак болууга чакырган.
"Жогорудагы жагдайдан улам улуттук валюта катары 20, 50, 100, 200, 500, 1000 жана 5000 сомдук номиналдар гана сунушталарын эскертет. "Кыргыз Республикасынын Улуттук банкы тууралуу" мыйзамына ылайык, акча белгилерин чыгаруу укугу бир гана Улуттук банкка берилген", — деп жазылат маалыматта.
Эске салсак, жасалма акчаны жасагандар гана эмес, аны тараткан адамдар да беш жылга чейин эркинен ажыратылып, үй-мүлкү камакка алынат.
Эгер ушул эле кылмышты топтошуп жасаса, анда үй-мүлкү 10 жылга чейин камакка алынат.
