БИШКЕК, 23-сен. — Sputnik. Казакстандын Сарыагаш районунун полициясы түн ичинде жергиликтүү дүкөнгө кирип, 15 миң теңгеге (болжол менен 3 миң сом — ред.) бааланган балмуздактарды жеп салган деп шектелген кызды кармады. Бул тууралуу Sputnik Казакстан жазды.
Ээси эртең менен дүкөндү ачып, муздаткычтын тегереги чачылып жатканын көргөн. Бирок товарларды карап чыкканда, балмуздактан башка эч нерсе жоголбогону белгилүү болгон.
Бир нече сааттан кийин полиция Акмоло облусунан келген кызды колго түшүрүп, ал күнөөсүн моюндаган. Шектелүүчү эмне себептен балмуздакты мындай жол менен жегени макалада айтылган эмес.
Эми айыпкер бул кылганы үчүн чындап эле кесилип кетиши мүмкүн экени айтылды. Бирок шектүү дүкөн ээси менен макулдашып, чыгымдын ордун толтуруп берсе, эркиндикке чыгышы ыктымал.
