Айылдагы кинотеатрлардын эч нерсеси калбай, мал сарайга айланып калды. Бул тууралуу Салтанат Бараканова Sputnik Кыргызстан радиосунун таңкы эфиринде маек куруп жатып билдирди.
Анын айтымында, өкмөт аймактардагы маданият тармагына жетиштүү көңүл бурбай келет.
"Кино тармагы катар-катар эл аралык сыйлыктарды алып жатканы менен ичине сүңгүп кирип карасак, абалы оор. Мурда кандай сонун кинотеатрларыбыз бар эле. Эми болсо аймактардагы кинотеатрлардын кирпичине чейин калбай, орду бош, же мал сарайга айланып турат. Мына бул жылы аймактарды өнүктүрүү жылы деп жарыяланды. Бирок өкмөт тарабынан бул жаатта эч кандай иш-аракеттер аткарылбай жатат. Кинотеатрларды жандантып койсок аймактагы жарандар өздөрү эле тасма көргөнү барып калмак. Болгону ыңгайлуу шарт гана түзүлбөй жатат", — деди серепчи.
Ал жеке студиялардын салымы менен кыргыз киносу өнүгүп жатканын кошумчалады.
