БИШКЕК, 8-сен. — Sputnik. Жеңил салмактагылар арасындагы UFC чемпиону Нико Монтано курунан айрылды. Ал эми бул наам үчүн кыргызстандык Валентина Шевченко күч сынашат. Бул тууралуу MMA Fighting сайты аталган уюмдун башчысы Данна Уайтка шилтеме берип жазды.
АКШда жекшемби күнү өтчү беттеш Монтанонун ооруканага жатып калгандыгына байланыштуу болбой калды. UFC уюмунун дарыгерлери америкалык спортчунун саламаттыгын текшерип, анын бөйрөгүндө көйгөйлөр бар экендигин аныктаган.
Ал эми Шевченко каршылашы кесипкөйлүккө жатпаган аракеттерди жасап, беттештен атайын качып жаткандыгын айтып чыкты.
Уайттын айтымында, титул учурда ээсиз калды.
"Чындыгында Шевченко титул үчүн кармашка чыгууну көксөп турат. Буга байланыштуу биз жыл соңуна чейин башка беттешти уюштурабыз. Учурда бул маселе каралып жатат", — деди ал.
Нико Монтано жаралган абал боюнча үн ката элек. Ал эми анын менеджерлери UFC уюмунан мындай кабар келе электигин билдирүүдө.
