БИШКЕК, 6-сен. — Sputnik. Кыргызстанда 2017-жылдан бүгүнкү күнгө чейин "Инфоком" мамлекеттик ишканасы тарабынан өзгөчө 10 унаа номеринин ар бири 100 миң сомдон сатылды. Бул тууралуу Sputnik Кыргызстан агенттигинин кабарчысына Мамлекеттик каттоо кызматынан кабарлашты.
Сатылган номерлер:
— AMG;
— DXB F3;
— RIS;
— LEXUS;
— VIP 01;
— LX1AAA;
— NOK 01;
— NOK 02;
— NOK 03;
— NUZHDOV.
Белгилей кетчү жагдай, өзгөчө номерлерди сатып алуу үчүн атайын шарт-талаптар бар. Мисалы, номер үчүн банк аркылуу төлөм жүргүзүү менен Транспорт жана айдоочулук түзүмдү каттоо департаментине арыз таштоо керек.
Ошондой эле номерлерди даярдоо боюнча да эреже каралган:
— номердин пластинасы ак түстө болуп, Кыргызстандын желеги түшүрүлөт;
— номерге сандык символдорду (араб) жана латын алфавитинин баш тамгасын жазууга жол берилет;
— номерде жок дегенде эки тамга болушу керек, ал сандын баш жагында жайгашуусу шарт;
— Кыргызстандын мамлекеттик органдарынын аббревиатураларын жазууга болбойт;
— номерде Кыргызстандын конституциясына, суверендүүлүгүнө жана аймактык бүтүмдүгүнө шек келтирген, башка элди келекелеген, согушка чакырык жасаган символдордун жазылышына жол берилбейт;
— сөгүнгөн сөздөрдү жазууга болбойт.
