Кырчын этно-шаарчасында XIX кылымдагы кыргыздардын салты боюнча үлпөт той өттү. Үйлөнгөн жигит III Дүйнөлүк көчмөндөр оюнунун уюштуруу катчылыгынын инфраструктура боюнча координатору Союзбек Надырбеков.
Анын кесиптеши Таалайбек Бердиевдин айтымында, бул дагы программадагы театралдаштырылган оюн-зооктордун бири болчу.
"Биз XIX кылымда кыргыздар кандай үлпөт той өткөргөнүн жана кандай салт-санааларды колдонгонун азыркы тойлордон эмнеси менен айырмаланарын көрсөткүбүз келди. Бул көбүнө жагымдуу маанай тартуулап, жакшы таасир калтырды деп ишенебиз. Анан да мунун баары жөн гана оюн-зоок эмес чыныгы үлпөт экени кубандырат", — деди Бердиев.
Бул жакка Кыргызстандын жети дубанынан өкүлдөр келди. Ар бир аймак үчүн атайын өзүнчө жер бөлүнгөн. Ошондой эле "Бишкек ордо" менен "Ош ордо" дагы бар. Этно-шаарчанын коноктору үчүн оюн-зооктор өтүп жатат.
Кырчындагы иш-чаралар Көчмөндөр оюндары аяктаганча — 8-сентябрга чейин уланат.
