БИШКЕК, 3-сен. — Sputnik. Ысык-Көлдүн Чолпон-Ата шаарында өткөн Түрк тилдүү мамлекеттер кызматташтыгы кеңешинин өлкө башчыларынын саммитинин жыйынтыгында бир катар документтерге кол коюлду.
3-сентябрда өткөн саммитке Түркиянын президенти Режеп Тайип Эрдоган, Азербайжандын президенти ИльХам Алиев, Казакстандын президенти Нурсултан Назарбаев катышты. Андан сырткары, Өзбекстандын президенти Шавкат Мирзиёев менен Венгриянын премьер-министри Виктор Орбан ардактуу конок катары чакырылган.
Кол коюлган документтердин тизмеси:
1. Түрк кеңешинин башкы катчысын, башкы катчынын орун басарларын жана Түрк академиясынын президентин дайындоо жөнүндө чечим;
2. Түрк Кеңешинин Венгрияга байкоочу статусун берүү жөнүндө чечим.
Кабыл алынган документтер:
1. Түрк тилдүү мамлекеттердин интеграциясынын концепциясынын долбоору;
2. Спорттун улуттук түрлөрү жана жаштар жаатындагы кызматташтыкты өнүктүрүү боюнча Түрк кеңешинин мамлекет башчыларынын биргелешкен билдирүүсү;
3. Түрк Кеңешинин мамлекет башчыларынын Чыңгыз Айтматовдун 90-жылдыгына карата биргелешкен билдирүүсү.
Быйыл Кеңешке төрагалык кылуу Казакстандан Кыргызстанга берилди.
