БИШКЕК, 1-сен. — Sputnik. КР президенти Сооронбай Жээнбеков Түркиянын президенти Режеп Тайип Эрдоган менен "Ала-Арча" мамлекеттик резиденциясында кеңири форматта жолугушуу учурунда 2020-жылкы Көчмөндөрдүн төртүнчү дүйнөлүк оюндары Түркияда өтө турганын айтты.
Түрк президенти 1-сентябрда Кыргызстанга расмий иш сапары менен келди.
"2020-жылы өтө турчу Көчмөндөрдүн дүйнөлүк оюндары Түркияда өтөт. Буга байланыштуу Түркияны кызуу куттуктайм", — деди Жээнбеков.
КР президенти ошондой эле Көчмөндөр оюндарын даярдоодо жана өткөрүүдө көрсөтүлгөн олуттуу жардам үчүн Түркияга жана Режеп Эрдоганга чоң ыраазычылыгын айтты.
Жээнбеков өз сөзүндө Эрдогандын бүгүнкү сапары кыргыз-түрк кызматташтыгынын бардык багыттарына импульс берип, аларды жаңы бийик деңгээлге чыгарары шексиз экенин белгиледи.
Андан сырткары, Түркия Кыргызстандын тышкы соода чөйрөсүндө ири соода-экономикалык өнөктөштөрдүн бири катары өзгөчө орунду ээлей турганын билдирди. Ошондой эле соода жүгүртүүнүн көлөмүн 1 миллиард долларга чейин көтөрүү боюнча мурда аныктаган максаттарды иш жүзүнө ашырууда бардык аракеттерди көрүү зарылдыгын айтты.
