БИШКЕК, 1-сен. — Sputnik. Түркиянын президенти Режеп Тайип Эрдоган өлкө башчысы Сооронбай Жээнбековдун чакыруусу менен Кыргызстанга расмий иш сапары менен келди. Эки мамлекеттин президенттери тар жана кеңири чөйрөдө жолуккандан кийин журналисттер үчүн билдирүү жасашты.
Түрк президенти ошондой эле расмий сапарынын алкагында 2-сентябрда Ысык-Көлдөгү Көчмөндөрдүн үчүнчү дүйнөлүк оюндарынын ачылышына катышат.
Тараптар бүгүнкү жолугушуулардан кийин бир катар маанилүү документтерге кол койду.
Тизмеси:
1. Чыңгыз Айтматов атындагы Кыргыз-түрк маданият борборун түзүү жөнүндө меморандум;
2. КР Саламаттык сактоо министрлигинин дары-дармек жана медициналык техника менен камсыздоо департаменти менен Түркиянын Саламаттык сактоо министрлигинин дары каражаттары жана медицина шаймандары агенттиги менен өз ара түшүнүшүү меморандуму;
3. КР Билим берүү жана илим министрлиги менен "Маариф" фондусунун ортосундагы меморандум;
4. КР Эмгек жана социалдык өнүгүү министрлиги менен Түркиянын үй-бүлө жана социалдык саясат министрлигинин ортосунда кызматташуу ниети жөнүндө меморандум;
5. КР өкмөтү менен Түркия өкмөтүнүн ортосунда Кыргыз-түрк достук ооруканасын ачуу, биргеликте башкаруу жана Кыргызстандын жарандарын Түркияда медицина жаатында билим алуусу боюнча келишим;
6. КР өкмөтү менен Түркия өкмөтүнүн ортосунда 1994-жылы 14-октябрда Анкарада кол коюлган аба каттамын түзүү жөнүндөгү макулдашууга өзгөртүү киргизүү боюнча протокол;
7. Кыргыз өкмөтү менен Түркия өкмөтүнүн ортосунда өзгөчө кырдаалдардын алдын алуу жана анын кесепеттерин жоюу тармагындагы кызматташуу тууралуу макулдашуу;
8. КР өкмөтү менен Түркия өкмөтүнүн ортосундагы керектөөчүлөрдүн укугун коргоо жана рынокту көзөмөлдөө тармагындагы кызматташуу жөнүндө меморандум;
9. КР өкмөтү менен Түркия өкмөтүнүн ортосундагы биргелешкен бажы комитетин түзүү жөнүндөгү меморандум;
10. КР өкмөтү менен Түркия өкмөтүнүн ортосундагы техникалык жөнгө салуу, стандартташтыруу, шайкештикти баалоо жана аккредитациялоо, метрология тармактарында кызматташуу жөнүндөгү келишим;
11. КР өкмөтү менен Түркия өкмөтүнүн ортосунда аскерий-финансылык жардам жөнүндөгү протокол;
12. Кыргызстан менен Түркиянын ортосунда биргелешкен билдирүү.
