БИШКЕК, 1-сен. — Sputnik. Ош шаарында Өзбекстандын каржылоосу менен курулган Алишер Навои атындагы №18 мектеп-гимназиянын ачылыш аземи болду. Бул тууралуу аталган мектептин директору Турдайым Карамырзаева билдирди.
Мектептин курулушу өткөн жылдын октябрь айында башталып, аны Өзбекстандын "Трест-12" курулуш компаниясы колго алган. Аталган мектепте ашкана, жыйындар жана спорт зал, кичи футбол жана баскетбол аянтчалары да бар. Ошондой эле, заманбап жабдыктар жана эмеректер менен камсыздалган.
"2018-жаңы окуу жылына мектеп-гимназия 1100 окуучуну кабыл алды. Окутуу кыргыз тилинде жүргүзүлөт. Ал эми орус жана англис тилдери тереңдетилип окутулат" — деди Карамырзаева.
Салтанатка Жогорку Кеңешинин төрагасы Дастанбек Жумабеков жана депутаттар, Өзбекстандын Олий Мажлисинин төрагасы Нигматулла Юлдашев, Ош облусунун жана Андижан облусунун жетекчилери катышкан.
