БИШКЕК, 8-авг. — Sputnik. Борбор калаадагы ТЭЦти реконструкциялоо боюнча козголгон кылмыш иштин алкагында камакка алынган мурдагы премьер Жантөрө Сатыбалдиевдин, Улуттук энергохолдингдин мурдагы төрагасы Айбек Калиевдин, анын орун басары Жолдошбек Назаровдун, “Электр станциялары” ишканасынын экс-жетекчиси Салайдин Авазовдун, Кытайдын ТВЕА компаниясынын өкүлү Мусажан Макелектин камакта болуу мөөнөтү узартылды. Бул тууралуу Бишкектин Биринчи Май райондук сотунан билдиришти.
Аты аталгандар УКМКнын убактылуу тергөө абагында 13-октябрга чейин болот.
Сатыбалдиев 18-июнда кармалган болчу. Ал буга чейин УКМКга сурак берип чыккан. Калиев болсо 18-апрелде кармалып, 19-апрелде камакка алынган.
ТЭЦтин айланасындагы чыр боюнча 10дон ашык киши камакка алынган.
