БИШКЕК, 6-авг. — Sputnik. Мурунку өкмөт башчы Сапар Исаков УКМК кызматкери тарабынан опузалоого туш болгонун айтып, башкы прокурор Өткүрбек Жамшитовдон аталган фактыны текшерүүсүн өтүндү. Бул тууралуу КСДПнын расмий өкүлү Кундуз Жолдубаева билдирди.
Исаковдун билдирүүсүндө 13-июль күнү саат 11.00дө аны абак тергөөсүнөн УКМКнын тергөөчүсү Кубанычбек Сабыровго алып барышканы айтылат.
"Сабыров кабинеттен чыгып кеткенден кийин өзүн Илим деп тааныштырган УКМКнын кызматкери адвокат Нурбек Токтакуновдон баш тартууну сунуштады. Болбосо WikiLeaks сайтына мурун чыккан материалдар боюнча мага карата дагы бир кылмыш ишин козгой турганын айтты. Мен макул болбой, аталган фактыны ачыкка чыгарууну тапшырдым", — деди Исаков.
Мурунку өкмөт башчы аталган кызматкер аны Биринчи Май райондук сотуна коштоп барганын, камакка дал ошол жерден алынганын белгилеген.
Адвокат опузалоо тууралуу ачыктагандан кийин УКМК бул фактыны төгүнгө чыгарган.
"Бардык жоопкерчиликти мойнума алып, адвокат мен айткан нерсени гана коомчулукка чыгарганын билдирем", — деди Исаков.
Аягында мурунку премьер тергөөнүн кызматкери айыпталуучуну жактоочусунан баш тартууга мажбурлоосу кызмат абалынан кыянаттык менен пайдалануу (Кылмыш жаза кодексинин 305-беренеси) катары эсептелерин, ага кошумча адвокаттык ишмердүүлүккө тоскоолдук жаратуу аракети (Кылмыш жаза кодексинин 318-беренеси) деп баалана турганы айтылган.
