БИШКЕК, 5-авг. — Sputnik. Президент Сооронбай Жээнбеков Россиянын президенти Владимир Путинге Ми-8 тик учагынын кыйрашынан улам көп адамдардын курман болгондугуна байланыштуу көңүл айтты. Бул тууралуу мамлекет башчысынын маалымат кызматы билдирди.
"Красноярск крайында Ми-8 тик учагынын трагедиялуу кыйрашынан улам көп адамдардын курман болгондугу тууралуу кайгылуу кабарды терең кайгыруу менен кабыл алдым. Кыргыз элинин атынан жана өз атымдан каза тапкандардын туугандарына жана жакындарына терең кайгыруу менен көңүл айтуумду жеткирип коюуңузду өтүнөм. Орду толгус оор жоготуунун аза кайгысын тең бөлүшөбүз", — айтылат мамлекет башчысынын телеграммасында.
Белгилей кетсек, авиакырсык 4-августта Бишкек убактысы боюнча эртең мененки саат 9:00дөр чамасында болгон.
Аталган факты боюнча РФтин Кылмыш кодексинин 263-беренесинин негизинде иш козголгон.
