БИШКЕК, 2-авг. — Sputnik. Кыргызстанга Афганистандан келген памирлик кыргыздардын ичинен бир үй-бүлө уулдуу болду. Бул туурасында Нарын облустук борборлоштурулган ооруканасынын төрөт бөлүмүнүн башчысы Барчынай Темирова Sputnik Кыргызстан агенттигине айтып берди.
"Ширинбүбү Памирли 31-июлда саат 00:30да көз жарды. Баланын салмагы 1978 гр., бою 45 сантиметр. Эненин абалы канааттандырарлык", — деди Темирова.
Ал эми бала айына жетпей төрөлгөндүктөн учурда Нарын облустук ооруканасынын ара төрөлгөн балдардын бөлүмүнө которулганын кошумчалады.
Эске салсак, Ширинбүбү Памирли (Ширинбүбү Абдувахит кызы) Кыргызстанга турмушка жаңы чыккандан кийин көп өтпөй келген. Sputnik Кыргызстан студияга чакырып, заманга ылайык, бирок өзүнө туура келген көйнөк кийгизип, макияж коюп, сүрөткө тарткан.
Анда Ширинбүбү күйөөсү Фазылхак Абубакир уулу экөө тең Кичи Памирде туулуп-өскөндүгүн жана Нарын шаарында жаңы жашоо баштагандыктарын айтып берген.
Учурда Нарын облусунда 31 этникалык кыргыз жашап жатат.
