БИШКЕК, 25-июл. — Sputnik. ЖК депутаты Чыныбай Турсунбеков "Азаттык" радиосунун журналисти Улан Эгизбаевдин сууга чөгүүсү боюнча пикирин айтып, каргаша 22-июлда түшкү саат 1:30 менен 1:45тердин ортосунда болгонун Sputnik Кыргызстан агенттигинин мултьимедиалык маалымат борборундагы тегерек стол учурунда билдирди.
Анын айтымында, Эгизбаев чөгүп кеткен пансионатта үч куткаруучу бар, алар ӨКМдин атайын сертификатын алышкан.
"Биздин үч куткаруучу ӨКМдин сертификатын алышкан. Окуя саат 1.30 менен 1.45тин ортосунда болуптур. Бул маалда бир куткаруучу түшкү тамактанууга кетип, бирөө нөөмөттө турган экен. Ал видеону мен да көрүп чыктым. Улан алыс кетпей эле, балдар сууга түшкөн жерде жүрүптүр", — деди депутат.
"Бул бир гана кишинин көрсөтмөсү. Бирок видеодо көрүнүп тургандай жардам жети мүнөттөн кийин болгон. Тилекке каршы кеч болуп калган", — деди Турсунбеков.
"Азаттык" радиосунун журналисти Улан Эгизбаев 22-июлда Ысык-Көлдөгү "Акун" пансионатынын аймагында сууга чөгүп кеткен. Анын сөөгү 24-июлда Кочкор районунда Көк-Жар айылында жерге берилди.
