БИШКЕК, 23-июл. — Sputnik. Кыргызстанда туулган эки жаран Москва шаарынан балдарды барымтага алганын EG.ru басылмасы "РЕН-ТВ" каналына таянуу менен жазды.
Маалыматка караганда, окуя 23-июлда Симоновский көчөсүндөгү көп кабаттуу үйлөрдүн биринде болгон. Эки киши үчүнчү кабаттагы батирлердин бирине кирип барып, ал жактагы аялдардан акча талап кылышкан. Бирок үйдөгүлөр сыртка качып чыкканга жетишкен. Алардын бирине медициналык жардам көрсөтүлүп, жабырлануучу баласы батирде калганын айткан.
Бул маалыматты Россиянын бир нече ЖМКлары таратты. Ошол эле учурда Россия ИИМинин Москва боюнча башкармалыгы балдар барымтага алынган деген кабарды жокко чыгарды.
Укук коргоо органдарынын маалыматы боюнча ижарага алып жашаган аялдардын үйүнө белгисиз эки киши кирип келип, дал ушул үйдө жашаган таанышы акча карыз экенин айтып талап кылган.
Жаңжал учурунда аялдар сыртка качып чыгып, кишилер балдарды алып үйдүн эшигин жаап алышкан. Маалыматта аларды полиция менен Росгвардиянын кызматкерлери кармаганы жана жабыркагандар жок экендиги кошумча кабарланды.
Учурда аталган факты боюнча тергөө амалдары жүрүп жатат.
