БИШКЕК, 22-июл. — Sputnik. Ысык-Көл облусунун аймагында каттамга чыккан автобустун айдоочусунун мас экендиги аныкталды. Бул туурасында Жол кыймылынын коопсуздугун камсыздоо башкы башкармалыктан кабарлашты.
Тартип бузуу Бостери айылында атайын рейд учурунда аныкталган.
Neoplan үлгүсүндөгү автоунаа жекшемби күнү эртең менен токтотулган. Автобус Түп — Бишкек каттамы менен сапарга чыккан. Салондо 50 жүргүнчү, алардын ичинде балдар да болгон.
"Документтерди текшере келгенде Казакстандын жараны болгон айдоочудан арактын жыты байкалган. Автоиспекторлор анын ичкен-ичпегендигин аныктоо үчүн дароо атайын жайга жиберди. Текшерүүнүн жыйынтыгында, анын мас экени тастыкталды", — деп аталган кызматтан билдиришти.
Ал эми Казакстандын 48 жаштагы жаранына, айдоочуга карата КРдин Админстративдик кодексинин негизинде админстративдик протокол толтурулган. Эми ал 10 миң сом айып төлөп жана бир жылга чейин автоунаа айдоо укугунан ажыратылмакчы.
Учурда автоинспекторлор мас болуп алып кандайча каттамга чыккандыгын аныктоо оюнча иликтөө иштерин баштады.
