БИШКЕК, 20-июл. — Sputnik. Июнь айынын башынан бери ушул күнгө чейин Кыргызстанда 16 жашка чейинки 15 бала сууга чөгүп кетти. Бул тууралуу ӨКМдин маалымат кызматынан Sputnik Кыргызстан агенттигине билдиришти.
Маалыматка караганда, кырсыктын көбү тагыраагы, беш учур Чүй облусунда катталган.
"Экинчи орунда Ош шаары турат. Дээрлик эки айдын ичинде түштүк калаада төрт бала сууга чөктү. Ал эми Жалал-Абадда эки, Талас, Ысык-Көл, Ош облустарында жана Бишкек шаарында бирден учур катталды", — деп айтылат билдирүүдө.
Ал эми Жалал-Абад облусунун Сузак районундагы Кара-Алма аймагындагы эс алуу жайынан сууга чөгүп кеткен 5 жашар кыздын сөөгү бейшемби күнү табылган. Наристе бир күн мурда ошол эле эс алуу аймагында ойноп жаткан жеринен атасы таппай калган болчу.
