БИШКЕК, 9-июл. — Sputnik. Кыргызстандын Россиядагы элчилигинин өкүлдөрү Тула облусунун Заокский районуна барып, аталган жерде курулуп жаткан кыргыз айылынын айланасындагы маселени көзөмөлүнө алды. Бул тууралуу элчиликтин маалымат кызматы билдирди.
Эскерте кетсек, үстүбүздөгү жылдын май айында Кыргызстанда туулган жарандар тарабынан 478 жер тилкеси жеке менчик турак жай салуу үчүн сатып алынып, отурукташа баштаганы маалымдалган. 40тан ашуун үй курулуп, алардын ичинен 10 чакты там пайдаланууга берилген.
"Бирок 29-июнда Заокский районунун депутаттары жыйын өткөрүп, анда аймакты өнүктүрүүнүн башкы планы, ошол райондогу башка калк жайгашкан айылдардагы мыйзам бузууларга байланыштуу өзгөртүүнү кайра кароо боюнча токтом кабыл алган. Мындан улам отурукташкандар айылдын мыйзамдуулугу боюнча тынчсыздануусун билдирген", — деп айтылат билдирүүдө.
"5-июлда элчи Болот Отунбаев Россия ТИМинин КМШ боюнча 3-департаментинин директору Александр Стерник менен жолугуп, маселе көтөргөн. Өз кезегинде ал кырдаалды Тула облусунун өкмөтү менен талкууга аларын айткан", — деп айтылат маалыматта.
Элчилик маселени андан ары иликтөө менен маселени өз көзөмөлүнө алганын белгиледи.
