Лейлек районунун Жаңы-Жер айыл аймагындагы Жаштык айылында жайгашкан май куюучу бекет өрттөнүп, экинчиси да жабыркады. Бул туурасында ӨКМдин маалымат кызматынан кабарлашты.
"Алдын ала маалыматтар боюнча, өрттүн кесепетинен май куюучу бир станция толугу менен өрттөнүп, экинчи бекеттин кеңсеси күйгөн жана тажик жараны жабыркаган", — деп айтылат маалыматта.
Жабыркаган кишини Тажикстандын медициналык Тез жардам кызматы ооруканасына алып кеткен.
Тилсиз жоону өчүрүүгө саат 20:31де Лейлек райондук өрт өчүрүү кызматынан бир бригада тартылган. Окуя болгон жерге КРдин Өзгөчө кырдаалдар бөлүмүнүн ыкчам тобу жана медициналык Тез жардам кызматы чыгып кеткен.
"Андан сырткары Тажикстандын жакын жайгашкан райондорунан дагы 3 бөлүм тартылып, учурда жалпы 4 бригада иштеп жатат", — деп билдиришти ӨКМдин маалымат кызматы.
Тилсиз жоо саат 22:40дарда чектөөгө алынган.
Министрлик кырсыктын себептери боюнча толук маалыматты кечирээк бере тургандыгын айтышты.
