БИШКЕК, 2-июл. — Sputnik. Куала-Лумпур шаарында дүйнөлүк деңгээлдеги "GIRLS NOT BRIDES" аттуу конференция болуп, ага 300дөн ашуун уюмдан 500дөй киши катышты. Бул тууралуу конференцияга барып келген "Кыргызстан кыздар федерациясы" коомдук уюмунун мүчөсү Наргиза Нурлан кызы билдирди.
Катышуучулардын көпчүлүгүн Индия, Африка, Европа мамлекеттеринен барган түрдүү уюмдар түзгөн. Ал эми Борбор Азия чөлкөмүнөн болгону эки гана өкүл катышкан.
"Экөөнүн бири мен болсом, экинчиси Казакстандан келген катышуучу болду. Конференциянын негизинде эрте жашта турмуш курууну токтотуу жолдору каралып, ар бир уюмдун өкүлдөрү пикирлери менен бөлүштү. Мен дагы бул маселе биздин өлкөгө канчалык деңгээлде терс таасирин тийгизип жатканы жана кыздардын укугу мамлекет жана коом тарабынан коргоого алынышы керектиги тууралуу доклад даярдадым. Кыргызстандагы кыздар ала качуу жана жашы жете электе турмуш курууга каршы экендигин билдирдим", — деди Нурлан кызы.
Ал конференциядан тышкары Куала-Лумпур шаарынын кооз жерлерин, баалуулуктарын, тамак-ашын көрүү мүмкүнчүлүгү болгонун кошумчалады.
