БИШКЕК, 20-июн. — Sputnik. ИИМдин Криминалдык милициянын аймактар аралык башкармалыгынын Жалал-Абад облусу боюнча Уюшкан кылмыштуулукка каршы күрөшүү бөлүмүнүн кызматкерлери ишкерге бут тоскон уюшкан кылмыштуу топтун мүчөсүн кармады. Бул тууралуу облустук милиция кабарлады.
Маалыматка ылайык, окуя 25-май күнү болгон. Бирок опузалоого туш болгон ишкер ал тууралуу эч кимге билдирген эмес.
"Ыкчам маалыматтардын негизинде милиция кызматкерлери жабырлануучу менен жолугуп, арызын алышкан. Анда таш чыгарган заводунда отурган ишкерге Замир аттуу бала келип, сүйлөшүү үчүн Жалал-Абадга алып кеткени жазылган. Ал жакка барган соң жанындагылар менен 10 миң доллар талап кылып, бербесе буту-колун сындырып өлтүрүп коерун айтып коркутушкан. Ошол жерден 30 миң сомун алып, үйүнө алып келгенден кийин 85 миң сом акчасын алып кетишкен", — деп айтылат маалыматта.
Аталган фактынын негизинде Кылмыш жаза кодексинин 170-беренесинин (опузалап акча талап кылуу) негизинде иш козголуп, 18-июнь күнү кылмышка тиешеси бар делген уюшкан топтун мүчөсү колго түшүрүлгөн. Ушу тапта ал эки айга камакка алынып, тергөө амалдары жүрүүдө.
Жалал-Абад облустук милициясы опузалоого туш болгон жарандарды окуя тууралуу өз убагында билдирүүгө чакырат.
