БИШКЕК, 11-июн. — Sputnik. Баткендин Лейлек районуна караштуу Лейлек, Катраң, Сумбула, Тогуз-Булак жана Ак-Суу айыл аймактарында жүргөн селдин кесепетин жоюу иштерин өзгөчө кырдаалдар министри Нурболот Мирзахмедов жетектеп жатат. Бул тууралуу министрликтин маалымат кызматы билдирди.
Эскерте кетсек, кырсык 9-июнь күнү болгон. Жалпы район боюнча 16 турак үйгө, балдар бакчасына сел суулары кирип, 112 турак үйдүн жер тилкесин, 27 чакырым ички чарбалык жолду, 6 даана ички чарбалык көпүрөнү суу каптаган. Ошондой эле 21 баш бодо малды суу агызып кеткен.
Өзгөчө кырдаалдар министринин буйругу менен селден жабыркагандарга жардам көрсөтүүгө жана турак жайсыз калган тургундар үчүн ӨКМ тарабынан 10 орундуу 8 даана чатыр, 76 даана шейшеп жана жаздык тыштар, ар бири 20 литрлик 32 даана канистра, ар бири 14 литрлик 32 даана чака, 76 даана одеяло, 16 ашкана буюмдары, 32 брезент, 32 гигиеналык буюмдары КамАЗ унаасына жүктөлүп, Лейлек районуна жеткирилди.
Чатырлар орнотулуп берилип, жарандар көчүп кирүүнүн аракетин көрүүдө.
