БИШКЕК, 6-июн. — Sputnik. Кыргызстанда өлкө аймагына кымбат унааларды алып кирүүнүн кезектеги коррупциялык схемасы ачыкталганын Экономикалык кылмыштуулукка каршы күрөшүү кызматы (Финпол) билдирди.
Маалыматка ылайык, Финполдун кызматкерлери 2010-жылы чыккан Lexus RX 350 үлгүсүндөгү унааны аткезчилик жол менен кирген фактысын аныкташкан. Унаа Кыргызстанга 2017-жылы алып келинип, жасалма документ менен машинанын өзү жок туруп Жалал-Абаддын Кара-Көл шаарында каттоого алынган. Андан кийин унаа кылмыштын изин жашыруу үчүн бир нече ирет кайра катталган.
Машина 1-июнда кармалган. Финполдун баасы боюнча мыйзамсыз алып келүүнүн натыйжасында мамлекет 1 миллион 455 миң сомдук чыгым тарткан.
"Аталган факты боюнча Кылмыш жаза кодексинин 304 "Кызмат абалынан кыянаттык менен пайдалануу", 240 "Аткезчилик", жана 350 "Документтерди жасалмалоо" беренелеринин негизинде кылмыш иши козголду", — деп айтылат маалыматта.
Финпол унааны өлкө аймагына алып кирген жаран ыктыярдуу түрдө бажы төлөмдөрүн айып пулу менен кошо төлөп, бажы каттоосунан өтсө кылмыш жоопкерчилигинен бошотулушу мүмкүн экенин белгиледи.
